 | | |
| | |
|
Spaces home  ܓܨ M A H A ܓܨPhotosProfileFriends |  Tools   |
|
August 21 اخرة عرض الـ 1000 رسالة المجانية من فوادفون !
تصلها رسالة غريبة على الموبايل ..تعودت منذ فترة على ظهور أرقام غريبة على شاشة هذا الهاتف الصامت ..المزعج
فتحتها و فتحت عيناها معها و ربنا قلبها أيضاً ..
" بحبك ..مش لاقى كلام تانى ممكن أقوله .. هو أنا جيت على بالك "
تدهشها اللعبة من جديد , فتتصل بصديقتها للتأكد من أن هذا الرقم من خارج نطاق الأصدقاء و الزملاء
فتتأكد , فتتسع عيناها ليملؤها بريق فضول و خليط عجيب من المشاعر
فتعود لهاتفها مجدداً ,,فتقرأها مرة اخرى و تثبت نظرها على كل حرف ..لعلها تعلم من وراءها
" بحبك ..مش لاقى كلام تانى ممكن أقوله ..بسمه هو أنا جيت على بالك "
بسمه هو أنا جيت على بالك
فتضحك عيناها على حال تلك المحظوظة بسمه إذا كانت قد وصلت لها الرسالة بدلاً منها
بالتأكيد ستصبح مليون ضحكة و ليست مجرد بسمه
:)
July 21 سمك .. لين ..خروبسمك
الأمور تسير على أحسن وجه .. من المؤكد ان لو كان ده أحسن وجه , فالوجوه التانية من أقبح ما أتخيل ..
أمور عملى تسير على نحو غريب , و كأن كل شىء متآمر عليا .. لا أؤمن بنظرية المؤامرة بشدة .. و مابحبهاش ..بس ليه المرة دى الدنيا محسسانى إنها ضدى بشكل
شخصى كده ؟ فى تار بايت يعنى ؟
أحسن وجه- اللى الأمور بتسير عليه ده - إنى أفشل فى عمل تحقيق من أحلى التحقيقات اللى ممكن أعملها , دون أى تقصير منى .. سبحان الله
فجأة كل حاجة وقفت فى مكانها كأن الدنيا اتعمل لها
pause
و أنا لوحدى اللى بتحرك , و عمالة أحرك فى الحاجات اللى حواليا ..و هما واقفين واقفين .. و أول ما الدنيا تبدأ تتحرك يكون فات الآوان
و أول حركة هايعملها الناس من بعد الوقفة المصتنعة , إنهم يلوموك بشدة ..
لبن
حالى دلوقتى مايتوصفش إلا بكده : جلد بنى آدم مشدود جداً جداً من كتر ما الشمس حرقته .. و مش قادر يستحمل حد يلمسه
حتى لو كان حد هايضربه أو يطبطب عليه
...
لا قادرة أستحمل الطبطبة و المواساة .. ولا قادرة أستحمل الشدة و اللوم
مش قادرة أستحمل غير إنى أقعد مع نفسى ,, و اسكت
تمر هندى
عرفت النهاردة إنى نجحت ..و جبت جيد جداً
كلمتين " مبروك " و بوسة من هنا و تليفون من هنا
و ينتهى شقاء سنة ..حقيقى الأمور بتسير على نحو يضّحك ..
يضّحك جداً , لا حزناً ولا فرحاً
بى. اس : بعتذر بغباء عن عدم ردى على الردود
بس أنا متابعة كويس فعلاً July 11 أحزان و يعدوا ..
أحياناً لما تمر بأزمة ما , بترجع تدور فى أرشيف الأفلام عن فيلم يناسب أزمتك و مودك الحالى .. أحياناً بتكون بتدور فيه على حل للى بيحصلك ده و ماتلاقيش الفيلم , و ماتلاقيش الحل فتعرف ان السينما بأفلامها الكتير دى , مقصرة فى حقك كتير جداً
July 09 عيون ضيقة , تسكن براحمش هاتكلم عن البوست اللى فات , لما بفقد حاجة أو حد مابحبش أتكلم عنها أبداً
بفكر الأيام دى كتير فى عينايا , للعلم بالشىء ..عينايا ضيقين و صغيرين و لونهم أسود , و أكيد هايطلع لى حد فيلسوف ويقولى مفيش عيون سودا ..هاقوله هى لونها قاتم جداً لدرجة تخليك شايفها سودا ..
بفكر إنى بعمل حاجات كتير أوى بيها , و بستغنى بيها عن حاجات و كلام كتير جداً , هى صحيح صغيرة وضيقة ..بس دمها خفيف
و صحيح صغيرة بس بتعرف تقول كلام كبير و بيطلع منها أكتر مما تتخيل ..
يعنى مثلاً , لما ببقى فرحانة مابقولش لأصحابى أنا فرحانة .. ببص لهم جامد و هى فجأة بتطلع نور كده و بتلمع لدرجة أحس فيها بلمعانها
و لما أبقى عايزة اقول لحد حاجة دايماً أقوله بعينايا , يعنى أصدقائى المقربين مابعرفش أتعامل معاهم وسط الناس - فى الخصوصيات يعنى - إلا بعيونى
أبص لها البصة ..تفهم أنا عايزة أقول إيه .. مش عارفة إذا كان لعيونى تأثير قوى و كلامها واضح أوى كده , ولا فى ناس هى اللى عندها مقدرة قوية على إنها تقرا عيونك كويس و تفهمك ..
و لما أبقى زعلانة من زميلتى فى الشغل , أبص لها البصة إياها ..و غالباً بتبقى نوعين .. يا تتنييح يا نظرة سريعة جداً أشبه بالتجاهل
أظن ان كذا مرة حد يروح يسأل سمر " هى مها مالها ؟ " فتقولهم مالها يعنى ؟ , يقولولها " أصل بصتها عجيبة " , و هكذا
فى الغالب طبعاً مش بقول للناس اللى بعزهم قد إيه أنا بعزهم , فلما أبقى قاعدة فى الشغل و قدامى زميلتى و عايزة أقولها فى الوقت ده .. إنى فعلاً حاباها دلوقتى ..ببص لها و عينى تيجى فى عينها ..أفتكر مرة عملتها مع واحدة زميلتى و كنت فعلاً عايزة أقولها إنى مبسوطة بيكى النهاردة , بصيت لها و لاقيتها من غير أى كلام بعتت لى بوسة فى الهوا ,, فهمت ساعتها إنى عينى - الحمد لله - بتشتغل بطريقة متطمنة ليها
و لما بحب أستخبى من الناس , بلبس النضارة النظر بتاعتى ..بحسها فعلاً بتمنع شعاع الأحاسيس بتاعى .. يعنى مابتبينش أوى اللى أنا عايزة أقوله بعينايا
و تقريباً بلبسها لما أكون مكتئبة أو متضايقة أو عندى حالة هروب و تقوقع
حقيقى لما ببص لها فى المراية بستغرب على الرغم من إنها صغيرة كده و ضيقة كده
إلا إنها بتعرف تشيلهم جواها , و بتعرف تشيل أحاسيس زى دى فيها
و أنا عارفة إنى لما هاحب أقولك حاجة , هاقولك بعيونى الأول
و إنى لما أزعل منك هالبس النضارة الشمس أو النظر
و إن عيونى هاتبقى أجمل حاجة فيا , معاك
July 04 و لا بديل ..
ماحدش عنده دبدوب كبيـــــــــــر يحضنى ؟ أنا مش عايزة دبدوب أحضنه أنا عايزة دبدوب يحضنى ربنا يباركلك يا بنتى ياللى كنت واقفة على المحطة و معاكى دبدوب قدك مرتين أكيد اتفرتك من كتر ما قعدت أبص له , أصله ظهر فى وقت مش مناسب أبدا أبدا
June 30 : (June 19 أتارى أولك اخر
حاسة إن بقالى كتير مارغيتش ولا اتكلمت .. فى الحقيقة ان مفيش حاجات مهمة كتيرة فى حياة الواحد تستحق إنه يتكلم عنها ..أو ينشرها أمام العامة
لكن الرغبة الملّحة فى تحريك شفتيك و التحدث فى أى أى حاجة ..هو الدافع الأساسى للى أنا بعمله دلوقتى .. بـــطمن إنهم لسه بيعرفوا يتكلموا زى زمان
......
(1)
أنا بفكرّ جدياً إنى أسيب الشغل , الفكرة دى مايعرفهاش إلا عدد محدود جداً ..يمكن أبويا و أمى ماعندهمش أى فكرة عنها , مش عارفة عايزة أسيبه لية ! مش حاسة ان ده مكانى و مش حاسة بإن البنت اللى بتقعد على المكتب هناك هى مها اللى بتقعد معاكم هنا و بتتكلم دلوقتى
و مش حاساها أبدا و هى بتتكلم مع الرؤوس الكبيرة هناك ..مها - اللى عهدتها أنا - بتقف عند باب الشغل و واحدة تانية مكانها بتدخل ..ماأعرفش أحسن ولا أوحش ..بس مابحسش ان دى مها أبدا
و فى نفس الوقت مش قادرة أسيبه , خايفة أوى من فكرة إنى أقعد فى البيت مش ورايا حاجة دى , أوك أنا كنت البنت دى فى يوم ..لكن بقالى سنة مش البنت دى ..و زى ما تقولوا اتعودت ..و مش قادرة برضة أحدد إيه أرحم لى , معاناة الشغل و لا معاناة القعدة فى البيت ؟
أنا مش فارقة معايا إنى أتعب فى الشغل خالص ولا حتى ماأخرجش مع أصحابى و أروح أشم نفسى فى حتة
أنا خايفة من حاجة واحدة فى المكان ده ,, إنى أخرج منه و أنا فى حاجة مكسورة جوايا ..أخرج منه و أنا مش معايا الحاجات اللى دخلت بيها
أخرج من غير ثقتى بنفسى أو من غير حماسى أو من غير براءتى - أو هكذا أدعىّ- أخرج من( غيرى) ,, أخرج من غير العصفور المتدلعّ
الحاجات دى بتضيع من غير ما نحس ..مرة ورا مرة ..لحد ما فجأة ..حتلاقيها مش معاك
مش عارفة
الحاجة الوحيدة اللى عارفاها إنى مش عارفة
........
(2)
من أسبوع تقريبا أو أكتر توفى عمى ..فى الحقيقة كانت أيام مؤلمة جدا ..ابتدت بإنه أصيب بنزيف فى المخ و دخل غيبوبة و ماقدرناش نعمل له غسيل الكلى لظروفه الصحية و صعوبة الأنتقال و انتهت بالوفاة
فى حاجة دايماً بتخوفنى لما أحب حد أوى , لما يروح ..و أكيد لازم يروح لإن كل حاجة بتروح ..الموت دايما بيقولى ..ماتحبيش حد أوى ..ماتتمسكيش بحد أوى
و أنا لما بدرك بشكل جدىّ فكرة الموت ..بعمل حاجة من إتنين
يا أما بسيب الحاجة اللى بحبها دى يا أما بتمسك بيــها أوى أوى , بس للأسف أنا ماعملتش أى حاجة مع عمو محمد
أنا مش مدركة ان حكايتى مع عمى خلصت خلاص , يعنى مش هاشوفه تانى ولا هايحضنى تانى ..خلاص ..خلصت الحكاية ؟
بصراحة , واحشنى ..واحشنى أوى
.......
(3)
مـــــــــــــــا توحشنيـــــــــــش !!
ولا تخلينى أوحشك
كلمة أخيرة : " بكلمة من ده و كلمة من ده , تعرف إنك أقل واحد هناك " ,,, من فيلم أوقات فراغ
كلمة بعد الأخيرة : مش كل مرة بترفع فيها راسك لفوق بتبقى منتصر ..أحياناً بترفع راسك لفوق علشان تمنع دموعك من إنها تنزل ..
بالمناسبة الساوند تراك بتاع البوست ده هنا May 31 و أنا فـ نص السلم
لكى تهبط حالتك إلى الأسفل فهذا لا يحتاج إلى مجهود كبير و قد لا يحتاج أى مجهود من الأساس , كشخص يهبط درجات سلم .. فيجد نفسه بعد أن كان فى الطابق العاشر أصبح فجأة و بسرعة البرق فى الطابق الأرضى ..تحت الأرضى
و لكى تعلو بفرحتك فهذا يحتاج إلى أكثر من مجهود , كشخص يصعد درجات سلم ,,فتتحول قدامه الكبيرتان إلى قدما طفل يحبو , لا يحتاج قدماه فحسب لكى يصعد ,, فقد يحتاج إلى كفاه و قدماه و كل جسده الكبير الصغير
لأن كل ما نريده بالأعلى ,, لأن كل ما لا نريده بالأسفل
لأن كل ما نريده بالأعلى ,, لأننا بالأسفل ..بالدرك الأسفل
ترى هل تلك هى الإجابات لـ " سؤالك " يا منير ؟
May 17 so .. i have bad days
2 Days على الهامش : أنا مُتسهلَكة جداً ..فكرياً و بدنياً و عاطفيا و يبدو ان شعار المرحلة : خروف يمشى وراء القطيع
May 12 أجدع نظرية فى التاريح ..
نتكلم عن نظرية الطفو ؟
تناسبهم جدا هذه النظرية , بيطفوا على السطح نظرا لخفتهم التى لا يُستهان بها
فيظهروا على السطح و كأنهم واقفين مش بيطفوا .. فيسرقوا الأنظار ..و بقول يسرقوا ..
يعنى مش من حقهم ..
نيجى للناس التقيلة ..طبقا لنظرية الطفو
فهم فى القاع ..محتاجين دايما غواص يكتشفهم ..محتاجين وقت كبير علشان يظهروا
محتاجين دايما الناس تنزلهم فتكتشفهم , مايطلعوش هما للناس أبدا
أحلى حاجة فى النظرية دى , ان مفيش حاجة بتتعلق فى النص
يا تبقى فوق , يا تبقى تحت ..
May 10 " إن تهت هاتلاقينى , فى حين ميسرة "
فصّ زمرد , فصّ ياقوت
جرح يعلمّ , جرح يفوت
سر الدنيا, سحر الدنيا
ناس فى شوارع
ناس فى بيوت
حلم بينده حلم كبير
ولا يوم تخلص الأحلام
فص زمرد فص ياقوت
و إحنا بنجرى مع الأيام
..
مرة حقيقة و مرة خيال
ممكن مرة و مرة مُحال
و لسه ليالى ألف ليلة
و لسه بنجرى مع الأيام
..
من فيلم صياد اليمام
|
|
|
